चार महिना अघि हराएका निर्भिकको अवस्था अझै अज्ञात 

जेठ २९,काठमाडौं,काव्य घर । सुनसरी जिल्ला, धरान उपमहानगरपालिका–८का गोविन्द तामाङले आफ्नो हराइरहेको नाती निर्भिक तामाङको खोजी गरिदिन आग्रह गरेका छन् । रिपोर्टर्स क्लब नेपालमा आयोजित पत्रकार सम्मेलन मार्फत उनले आफ्नो ६ वर्षीय नातीको खोजी कार्यमा सहयोग गरिदिन आग्रह गरेका हुन् । 
निर्भिक २०८० माघ २२ गते गोविन्द र उनकी आमा सम्झनासँग मावली घर इलाम जिल्लाको रोङ्गे गाउँपालिका दुधेखोला आएका थिए । सानी आमाको विवाहमा आएका निर्भिक गत माघ २५ गतेदेखि बेपत्ता छन् । 

गोविन्दको भनाइ अनुसार मावली घरको  हजुरआमा पर्ने दिलमाया तामाङले निर्भिकलाई लिएर गएकी थिईन् । निर्भिकलाई लिएर गएकी दिलमाया एक्लै फर्किएको र उनको अवस्था अहिलेसम्म अज्ञात रहेको गोविन्दले बताए । 
दिलमायालाई जिल्लाप्रहरी कार्यालयले नियन्त्रणमा लिएर अनुसन्धान गरी छाडेको छ । गोविन्दले आफ्नो नातीलाई जसले लगेको भएपनि आफ्नै बच्चा जसरी राखि दिन आग्रह गरे । 
उनले भने, ‘कसैले त्यो बच्चालाई लगेको छ भने ल्याइदिनुहोला । गलत तरिकाले लगेको भए पनि तपाईहरुले त्यसलाई राम्रोसँग खानपिन गराएर राखिदिनु होला । त्यो खर्च भएको हामी पछिदिनेछौं ।’ गोविन्दले आफ्नो नाती निर्भिकको खोजीकार्यमा सहयोग गरिदिन सरोकारवालाहरुसँग अपिल गरे । 
धरान उपमहानगरपालिका–८ का वडा अध्यक्ष धनबहादुर राईले पनि बालकखोजी कार्यमा सहयोग गरिदिन आग्रह गरे । उक्त घटनाले विगतचार महिनादेखि वडाबासीलाई नै दुःखी बनाएको प्रतिक्रिया दिए । आफूहरुले  निर्भिकको खोजीकार्यमा उनको परिवारलाई सक्दो सहयोग गरेको पनि उनले बताए ।