मुक्तकहरु -रेणुका चौलागाईँ
एक
ढुङ्गा बोल्नुपर्छ अब माटो बोल्नुपर्छ
सहिदहरुको रगतको टाटो बोल्नुपर्छ
धेरै बोले सुकिला र बाठाहरु देशमा,
यो देशको लागि अब लाटो बोल्नुपर्छ ।
दुई
समयमा नै आफै फुल आफैँ हामी माली बन्नु पर्यो
कतै सुरक्षित भएनौ नारी अब आफैँ दर्गाकाली बन्नु पर्यो
दिनानुदिन बढ्दै छन् झन्झन देशमा नारी हत्या र हिंसा
उठौँ अन्यायको विरुद्ध नारी अब शक्तिशाली बन्नु पर्यो ।
तिन
सिउँदोमा सिन्दुर हुदैमा जीवन रंङ्गिन हुँदैन
पतिले छोड्दैमा नारीको जीवन अर्थहीन हुँदैन
सधै अबला निरिह बनाई राख्न खोज्नेहरुको हो,
समय र सोच बदलिई सक्यो सधै प्राचीन हुदैन ।
चार
हिजो अस्ति जस्तै आज जतन नहुनसक्छ
सबैको उस्तै स्वच्छ निस्वार्थ मन नहुनसक्छ
निचोर्न थाल्छन् ,नदेखाउँनु घाउ अरू कसैलाई
आफुलाई जस्तै अरूलाई जलन नहुनसक्छ ॥
What's Your Reaction?