कविता – भ्यालेन्टाइन्डे -भाइको सुझाव दिदीलाई –प्रतिमा पोख्रेल (नयाँ सृष्टि )
दिदी सुन्दैछु आज प्रेमदिवस अरे !
अनि सुन्दैछु
यो त अर्कै देशबाट सापटी लिएको रे !
प्रेम ब्रह्माण्डमा भएका
बस्तुलाई हृदयको मझेरीमा राखेर
दयामायाको महासागर भित्र अपनत्वको
भावना देखाई सुन्दर, सुरक्षित र
अमूर्तको पिरामिडमाथि उभ्याइरहनु हो ।
युवायुवतीको जवानीका चक्करमा
प्रेमका रापहरू अत्यधिक रापिला र
रोक्नै नसकिने सुनामीझैँ कुनै
पर्वाह नगरी देखा पर्छन् अरे
भन्ने सुनेको थिएँ दिदी !
मलाई त था छैन प्रेम
कुन चरीको नाम हो ?
तर दिदी ! तपाईं त
जवानीको बगैंचाभित्र फुलेको
सबैभन्दा उत्कृष्ट र सुन्दर फूलझैँ
आकर्षक राम्री र रहर लाग्दो देखिनुहुन्छ ।
दिदी ! तपाईंको कलकलाउँदो
जवानीको सिकार खेल्न र
फूलदानीमा भरिएको रससरि
कसिलो र रसिलो शरीरको रस चुस्न
बैंसले मात्तिएकाहरू
यौन तृष्णाले आत्तिएकाहरू
कलुसित नजरमाथि
सेतो चस्मा लगाएर भन्भनाउँने
मानवरूपी भमराहरू
प्रेमदिवसको मौका छोपी
दिदी तपाईंलाई
प्रेमप्रस्तावका अनगिन्ती चाङहरू
आउन सक्छन् ,
होसियार दिदी......!
पठाका हुन सक्छन् प्रेमप्रस्ताव
कसैले फूलको पत्रभित्र
कसैले नयाँ वस्त्रभित्र
कसैले बोलीका खोटभित्र
कसैले पैसाको नोटभित्र
कसैले रित्तो बन्दी पार्सलभित्र
कसैले चिठीका खामभित्र ,
कसैले मिठो भोजनभित्र
दिदी ती प्रलोभनका प्रस्तावमा फँसेर
आफ्नो अस्मितालाई बजारमा लगेर
नबेच्नु होला !
बरु
उठाउनोस् अरू दिदीबहिनीहरूलाई
अनि
बचाउँनोस् सयौं निर्मला र भागिरथीहरूलाई
दिदी तपाईंको प्रेमप्रस्तावले पनि
जेलको चिसो खोरभित्र
बस्नुनपरोस् कुनै पुरुषले
नबनोस् कसैको घरबार विचलित,
हो दिदी तपाईंका कारणले
होनहार नेपाली दाजुभाइ
कतै बिलासिनु नपरोस् ,
दिदी प्रेम तेस्तो होस् !
जहाँ सर्त र स्वार्थ नहोस् !
होस् आत्मीयताबाट जन्मिएको ममता
र दयालु भावनामा मुछिएको
पूजाको पञ्चामृत ।
जहाँ बृद्ध, युवा, बालक
सबैमा सिञ्चित हुन सकोस् ।
हो दिदी !
प्रेम छ महिनाको बालकले
खेलाउने गुडिया नबनोस् ।
अरुण –५ भोजपुर
What's Your Reaction?