ज्येष्ठ नागरिक दिवसका अवसरमा सरकारद्धारा चट्याङ मास्टरलाई वर्ष पुरस्कार
पौष ११, काठमाडौं, काव्य घर । नेपाल सरकारले कृष्णमुरारी गौतमलाई वि.सं.२०८० को ज्येष्ठ नागरिक वर्ष पुरुषको रुपमा पुरस्कृत गर्ने भएको छ । उनी नेपाली साहित्यमा चट्याङ मास्टरका नामले परिचित छन् । एक लाख नगद राशी रहेको पुरस्कार महिला, बालबालिका तथा ज्येष्ठ नागरिक मन्त्रालयको ज्येष्ठ नागरिक संरक्षण शाखाले मन्त्रीस्तरीय निर्णय अनुसार गर्न लागेको हो ।
आज पुस ११ गते ज्येष्ठ नागरिक दिवसका अवसरमा सो पुरस्कार समर्पण गरिने मन्त्रालयका महिला विकास अधिकृत सन्ध्याकुमारी यादव हस्ताक्षरित पत्रमा जनाइएको छ ।
सिस्नुपानी नेपालका संस्थापक अध्यक्ष गौतम नेपालका प्रशिद्ध लेखक, कवि, हास्यव्यङ्ग्यकार र सामाजिक अभियन्ता हुन् । उनले बुढेसकाल अवस्थामा रहेका बूढाबूढीहरूको जीवनस्तर सुधारका लागि समर्पित एजिङ नेपाल नामको गैरसरकारी संस्थाको स्थापना गरेका छन् । सो संस्था सन् २०२० मा युनेस्को किंग सेजोंग साक्षरता पुरस्कारबाट पुरस्कृत भएको थियो।
What's Your Reaction?