माउन्टेन इनर्जीको शेयर किन ओरालो लाग्दैछ ?

२०८०, मंसिर१९, काठमाडौं , काव्य घर/माउन्टेन इनर्जीको शेयर किन ओरालो लाग्दै गएको छ । यसको मूल्य लगातार ४ दिनयता उच्च दरले घटिरहेको छ । गत बिहीबार, आइतबार र सोमबार लगातार १०–१० प्रतिशतले मूल्य घट्यो भने मंगलबार ८र९ प्रतिशत घट्यो । बिहीबार कारोबार खुल्दा कम्पनीको सेयर मूल्य प्रतिकित्ता ६५० रुपैयाँ थियो । त्यसयता ४ दिनसम्म उच्च दरले मूल्य घटेपछि मंगलबार कारोबार बन्द हुँदा मूल्य प्रतिकित्ता ४३४ रुपैयाँ ९० पैसामा झरेको छ । ४ दिनमै कम्पनीको मूल्य ३३ प्रतिशत अर्थात् प्रतिकित्ता २१५ रुपैयाँले झरेको छ । यसरी कम्पनीको मूल्य झर्नुको मुख्य कारण संस्थापक सेयरको लकिङ पिरियड खुल्नु हो ।

जलविद्युत् कम्पनीहरुको साधारण सेयर सेयर बाँडफाँट भएको मितिले ३ वर्षपछि संस्थापकको सेयरमा लकिङ पिरियड खुल्छ । लकिङ पिरियड खुलेपछि संस्थापक सेयर पनि साधारण सेयरसरह उहीं मूल्यमा कारोबार गर्ने बाटो खुल्छ । यसरी ठूलो संख्यामा संस्थापक समूहको सेयर साधारणसरह बजारमा आउँदा आपूर्ति ह्वात्तै बढ्न जान्छ । सो सेयर नआउँदैबाट साधारण लगानीकर्ताले बेच्न थाल्छन् । माउन्टेनको अहिलेको अवस्थामा आपूर्ति बढ्न गई मूल्यमा ठूलो असर परेको लगानीकर्ता पिताम्बर खकुरेलले बताए । यसरी निरन्तर ओरालो अवस्था भइरहेमा लगानीकर्ताको मनोबल समेत गिर्ने निश्चित छ ।