युट्युबर माथि नियमन जरुरी छ : वरिष्ठ उपाध्यक्ष सुवेदी
३० वैशाख,बुटवल /राजकुमार खड्का
पत्रकारहरूको वैचारिक संगठनले अब पेशाको शुद्धीकरणका निम्ति आ-आफ्नो भूमिका निर्वाह गर्नुपर्ने समाजवादी प्रेस संगठनका वरिष्ठ उपाध्यक्ष विश्वमणि सुवेदीले बताएका छन् ।
जनताले मूलधारको पत्रकारिताभन्दा सूचनाका वैकल्पिक साधनलाई बढी विश्वास गर्ने कुराले व्यवसायिक पत्रकारितामाथि चुनौती थपिएसँगै त्यस्ता साधनले पत्रकारिता पेशाकै हुर्मत लिएका कारण उक्त दायित्व निर्वाह गर्नुपर्ने उनको भनाइ थियो ।
शनिबार बुटवलमा आयोजित समाजवादी प्रेस संगठनको प्रथम जिल्ला अधिवेशनलाई सम्बोधन गर्दै वरिष्ठ उपाध्यक्ष सुवेदीले उक्त कुरा बताएका हुन् । उनले युट्युबरबाट भएका सूचना सम्प्रेषणका विसंगति नियन्त्रणयोग्य भएको र राज्यले पनि त्यस्ता सञ्चार साधनमाथि नियमनकारी नीति अबलम्वन गर्नुपर्ने उनको भनाइ थियो । उनले भने, ‘ हामी कन्टेन्टको आइडेन्टिटी, प्रोड्युस र प्रमोशनमा चुक्यौ कि भनेर आत्मसमीक्षा गर्ने बेला भएको छ ।’
कार्यक्रममा संगठनका लुम्बिनी प्रदेश अध्यक्ष हृदय भुसाल र लुम्बिनी विकास कोषका सदस्य सचिव सिद्दीचरण भट्टराईले पेशाको मर्यादासँगै संगठनको सुदृढीकरणमा जोड दिनुपर्ने धारणा राखेका थिए ।
उक्त अधिवेशनले विनोद परियारको अध्यक्षतामा १५ सदस्यीय जिल्ला कमिटी गठन गरेको छ । उक्त कमिटीका उपाध्यक्ष उषाकिरण पन्थ, पुनहरि बेलबासे, सचिव प्रतीक पौडेल, सहसचिव अस्मिता अधिकारी, कोषाध्यक्ष शिशिर पाण्डे रहेका छन् । सदस्यमा माधवेन्द्र यादव, बसन्त चन्द, गणेश नेपाली, जगन्नाथ सहनी, धनु गुरुङ, प्रशंसा भण्डारी निर्वाचित भए ।
What's Your Reaction?