भोलि फित्कौलीको खित्कौली सभा-२ आयोजना हुँदै

भाद्र ८,काठमाडौ, काव्य घर । भोलि  पाँचजना जेष्ठ र विशिष्ट व्यक्तित्वको आतिथ्यमा हास्यव्यङ्ग्यका पाँच स्रष्टालाई सम्मान, पुरस्कार, पाँचजना स्रष्टाका एकैपटक पाँच वटा कृति लोकापर्पण तथा रोचक र घोचक कार्टुनको प्रदर्शनी ।  नेपाली हास्यव्यङ्ग्य संवर्द्धन र अभ्युत्थानमा समर्पित फित्कौली अनलाइन मिडियाद्वारा यही भदौ ९ गते शनिबार जेष्ठ तथा विशिष्ट व्यक्तित्वहरूको प्रमुख आतिथ्यतामा बागमती बोर्डिङ स्कूल, सुकेधारामा ‘फित्कौलीको खित्कौली सभा-२’ कार्यक्रम आयोजना गरिने भएको छ । यस अन्तर्गत हास्यव्यङ्ग्यमा साधनारत व्यक्तित्वहरूलाई पुरस्कार समर्पण तथा एकै पटक झण्डै आधा दर्जन हास्यव्यङ्ग्य कृति र बुढ्यौली साहित्य कृति लोकार्पण गरिने भएको छ ।

 फित्कौली अनलाइन मिडियाद्वारा स्थापित ‘फित्कौली हास्यव्यङ्ग्य राष्ट्रिय सम्मान-२०८०’ द्वारा विगत चार दशकदेखि हास्यव्यङ्ग्य लेखनमा क्रियाशील व्यक्तित्व पाल्पाका चोलेश्वर शर्मालाई नगद रु २०,०००/- सहित सम्मान प्रदान गरिने भएको छ । त्यसैगरी स्याङ्जाकी हास्यव्यङ्ग्य लेखिका गायत्री परिरोशनीलाई ‘गोविन्द-विजया फित्कौली हास्यव्यङ्ग्य राष्ट्रिय प्रतिभा पुरस्कार-२०८०’, झापाका हास्यव्यङ्ग्य कवि खगेन्द्र नेउपानेलाई ‘फित्कौली हास्यव्यङ्ग्य राष्ट्रिय कविता पुरस्कार-२०८०’, गुल्मीका हास्यव्यङ्ग्य निबन्धकार काशीनाथ मिश्रितलाई ‘फित्कौली हास्यव्यङ्ग्य राष्ट्रिय निबन्ध पुरस्कार-२०८०’ र भक्तपुरका कवि रामशरण न्यौपानेलाई ‘मुकुन्द-मुना फित्कौली राष्ट्रिय बुढ्यौली साहित्य पुरस्कार-२०८०’ प्रदान गरिने भएको छ । यी पुरस्कारहरूको रकम जनही १५,०००/- र सम्मानपत्र रहेको छ भने फित्कौली प्रोत्साहन पुरस्कार स्वरुप कार्टुनिस्ट राजेश मानन्धरलाई नगद रु. १०,०००/- प्रदान गरिने भएको छ । यी पुरस्कारका निम्ति व्यक्तित्व छनोट गर्न हास्यव्यङ्ग्यकार चट्याङ मास्टरको संयोजकत्वमा सिस्नुपानी नेपालका अध्यक्ष लक्ष्मण गाम्नागे र डा. मुकेशकुमार चालिसे रहनुभएको छनोट समिति चयन गरिएको थियो । छनोट समितिले सिफारिस गरेका स्रष्टाहरूलाई सम्मानित र पुरस्कृत गर्ने निर्णय फित्कौली अनलाइन मिडियाले गरेको हो । कार्यक्रममा अग्रज हास्यव्यङ्ग्यकार नरेन्द्रराज पौडेलको ‘भ्यागुताको श्वेतपत्र’, राजेन्द्र कार्कीको ‘खाइराइड’, ठाकुरप्रसाद अधिकारीको ‘बेसारे घुर्की’, सुभाषचन्द्र देवकोटाको ‘ग्रहणतन्त्र’ गरी ४ वटा हास्यव्यङ्ग्य कृति र डा. मुकेशकुमार चालिसेको ‘डाँडाका उज्याला जून’ (पाका मान्छेका बारेमा पाठ्यसामग्री) एकैपटक विमोचन गरिने भएको छ । फित्कौली अनलाइन मिडियाले आयोजना गर्ने यो समारोहलाई फित्कौली कमेडी फेसबुक ग्रुपबाट लाईभ प्रसारण समेत गरिने भएको छ ।