मुक्तकहरु - कमला घिमिरे अधिकारी

फूलैफूलको बगैँचामा बसन्तको बहार थपेपछि
युगल जोडीले यसमै निश्वार्थ प्यार थपेपछि
सुन्दरताको अलौकिक दृष्यसँगै सन्तुष्टिको भाव,
कस्तो होला अझै गुलाबमा श्रृङ्गार थपेपछि ?

यस्तै मेरो कर्म सम्झेँ, सहनु नै धर्म सम्झेँ
खुसी मुहार भित्र पनि छन् लुकेका मर्म सम्झेँ
बिस्फोट भई ननिस्कियुन् गुम्सिएका भाव भन्दै,
सामाजिक परिधि भित्र बाबा आमाका शर्म सम्झेँ  ।

बाँचुन्जेल त भनिन्छ नि यस्तो नहोस्, उस्तो नहोस्
जीवन सोचे जस्तो नभए नि मृत्यु त्यति सस्तो नहोस्
अर्काकै लागि मात्र बाँच्ने जीवनको के सार हुन्छ र,
उस्तै, फूलको सुरक्षा मात्र गर्ने काँडा जस्तो नहोस्  ।